Аеродромот „Гетвик“ во Лондон е делумно отворен за сообраќај по повеќе од 30 часа од неговото затворање поради беспилотните летала што беа забележани во средата во текот на ноќта над пистата.
Аеродромот соопшти дека пистата е моментно достапна и дека се планирани полетувања и слетувања на авиони во ограничен број, пренесува Би-би-си.
Сообраќајот на „Гетвик“, вториот најпрометен аеродром во Велика Британија, беше во прекин речиси два дена кога беа забележани два беспилотни летала над пистата по што десетици илјади патници останаа заглавени на аеродромот.
Британската полиција вчера соопшти дека верува оти беспилотните летала биле најверојатно намерен акт, но дека немало знаци со кои може овој акт да се поврзе со тероризмот.
