Беса на Биљал Касами најави дека ќе поднесе четири амандмани на Уставот. Од партијата бараат албанскиот јазик да биде рамноправен со македонскиот, државата да се грижи за сите свои граѓани во дијаспората и претседателот на државата по второто гласање закон или друг акт во Собранието да нема право на вето. Пратеникот Фадил Зендели не сака нивните барања да се карактеризираат како условување за гласање за уставните измени.
„Тоа не е речник или филозофија на нашата политичка партија. Ние сметаме дека ова е демократско право и дека со години се наметнува и ја оптоварува политичката сцена и дека во овој момент кога се отвора Уставот би требало да се решат“, изјави Зендели.
Во однос на предлозите за помирување и амнестија Зендели вели дека е за помирување, но не за амнестија.
„Ако амнестираме носители на високи функции, одиме во погрешна насока. Тие што згрешиле според законот, треба да одговараат“, додаде Зендели.
