Многубројни светски медиуми ги пренесоа драматичните најави што ги објави британскиот весник „Сандеј тајмс“ за наводната скорешна ерупција на вулканот Катла на Исланд, која, пишува „Сандеј тајмс“, може да има катастрофални последици.
Во приказната што ја објави британскиот весник се тврди дека последните мерења извршени од страна на истражувачите откриле дека Катла исфрла огромно количество јаглероден диоксид и дека може да еруптира во секој момент, но еден од научниците кои работеа на студијата, Евгенија Илинскаја, ги негира овие информации и тврди дека во студијата се истакнува дека научниците не се во позиција да предвидат дали Катла ќе еруптира или во неа се акумулира магма.
Евгенија Илинскаја, научник од универзитетот во Лидс, на „Твитер“ напиша дека статијата во британскиот весник е срамна.
Професорот на Универзитетот на Исланд, Магнус Туми Гудмундсон, на „Фејсбук“ ја коментира статијата во британскиот весник велејќи дека студијата беше сосем погрешно интерпретирана во мејнстрим-медиумите.
