Министерот за надворешни работи, Никола Димитров денеска беше во посета на Охрид, каде се сретна со градоначалникот Јован Стојановски, а, како што информираат од прес-службата на кампањата „Излези за европска Македонија“, за време на прошетката низ градот се видел и разговарал со граѓани од Охрид.
Како последна активност за време на посетата, Димитров се обратил на граѓанска трибина, на која се осврнал на предизвиците со кои се соочуваат охриѓани, а како еден од главните предизвици бил идентификуван проблемот со одливот на младите од регионот.
„Ова е реален предизвик за Охрид и околината. Младите си одат во потрага за подобар живот, од град со огромен потенцијал. Тоа е нешто што мора да го смениме. Патот до таму не е краток, ниту па лесен и само одговорно и со многу работа ќе стигнеме до целта. Мора да успееме. Важно е да тргнеме по патот, низ вратата, со исправена глава. Следниот суштински чекор по патот кон европска Македонија ќе се случи на 30 септември“, изјавил министерот.
Димитров се осврнал и на економските бенефити од НАТО што, како што рекол, во голема мера ќе имаат релативно брз позитивен ефект во Охрид и околината, преку развој на туризмот но со фокус на еколошката одржливост и со внимателно планирање и имплементација на тој развој, со исклучиво важен акцент ставен на заштитата на животната средина.