Преместувањата на административни службеници на работни места надвор од нивното место на живеење стана инструмент за замолчување на партиските неистомисленици, а партиските послушници се унапредуваат надвор од закон, изјави денеска Никола Мицевски од ВМРО-ДПМНЕ, кој обвини дека актуелната власт врши притисок врз вработените во јавниот сектор.
Според Мицевски, врз вработените се вршат секојдневни притисоци и закани, се забранува учество и работа во синдикална организација, односно, како што рече, со притисоци и заплашувања се инсистира на излегување од синдикат или на премин во друг синдикат, кој според раководството е подобен и е под контрола на власта.
„Спротивно на Законот за работни односи, Законот за административни службеници и Законот за вработените во јавниот сектор, Раководните лица немилосрдно се изживуваат со вработените, изнудуваат барања за уназадување и откажување од раководен службеник, незаконски унапредува и овластува лица со јавни овластувања доколку се политички подобни или блиски со функционерот, за редовни работни задачи се информираат и се задолжуваат само подобните, односно се врши дискриминација“, рече пратеникот од ВМРО-ДПМНЕ на прес-конференцијата.
Тој исто така јавно упати и повеќе прашања меѓу кои и колку лица во институциите се унапредени со овластување од Министер или Директор и врз основа на кој закон овие функционери го црпат правото да унапредуваат, како и кога ќе се запре со заканите и уцените кон синдикалните здруженија и членовите на синдикат.
„Граѓаните и даночните обврзници очекуваат од институциите конкретни одговори а вие имате обврска да дадете отчет и воедно да создадете услови за пристојна работа, без закани и уцени“, подвлече Мицевски кој додаде и дека без почитување на правата на работен однос не е возможно да се интегрираме и напредуваме како општество и како држава.
