Емре Бостанџи (28), млад земјоделец од Анадолија, одлучил да ја продаде својата камила на интернет за да избегне служење на воениот рок.
„Ова ми е омиленото животно, но морам да го продадам. Ми требаат пари за да го решам прашањето за воената служба“, вели Бостанџи, објаснувајќи дека шестгодишната бела арапска камила е подарок од неговиот татко.
Бостанџи е еден од стотиците илјади турски мажи кои долго ја чекаат можноста да ја избегнат задолжителната воена служба.
Сите мажи постари од 18 години мора да поминат 12 месеци, но според неодамна усвоениот закон, сите родени пред 1 јануари 1994 година имаат можност да служат само 21 ден ако платат 15 000 турски лири (2 400 евра).
Во последните два дена речиси 200 000 од нив се пријавиле за скратена воена служба со паричен надоместок, објавија турските медиуми.
Многу млади Турци продаваат различни вредни работи, дури и недвижен имот, од автомобили преку камили и бикови до станови, со цел да ги добијат парите што ќе им овозможат да ја избегнат воената служба.
