Турскиот претседател, Реџеп Таип Ердоган, побара да биде замрзнат имотот на американски официјални лица во Турција, како одговор на сличните санкции кои Вашингтон ги воведе за турски министри поради задржувањето на американски пастор во куќен притвор во Турција.
„Имавме трпение до синоќа. Денеска ќе дадам инструкции – го замрзнуваме имотот на американските министри за правосудство и внатрешни работи во Турција, доколку го имаат“, рече Ердоган на говор во Анкара, пренесуван од државната телевизија.
Оваа изјава е директен одговор на одлуката на САД од средата, да ги санкционираaт турскиот министер за внатрешни работи Сулејман Сојлу и за правосудство, Абдулхамит Џуел.
Санкциите им беа наметнати поради наводно влијание во судењето на Ендрју Брансон, американски пастор, во Турција обвинет за терористичка активност и шпионажа.
Но, во конкретната ситуација не е сосема јасно дали турскиот претседател мисли на американскиот министер за внатрешни работи, Рајан Зинке, задолжен за националните паркови и политиката кон староседелците, или пак за министерот за внатрешна безбедност, Кристен Нилсен.
Агенцијата АФП побарала објаснување, но турските претставници не дале никакви индикации.
