Уметнички предмети во вредност од 40 милиони евра биле пронајдени за време на меѓународна четиригодишна полициска операција во Италија, Шпанија, Германија и Велика Британија.
Во таа ситуација 23 лица биле уапсени, соопшти „Европол“ во средата.
Повеќе од 250 полицајци истовремено извршиле претрес во 40 куќи во италијанските региони Сицилија, Калабрија, Пиемонт и Апулија, како и во Енинген во Германија, Лондон во Велика Британија и Барселона во Шпанија и заплениле околу 25 000 уметнички предмети.
Полициската операција траела четири години, а станува збор за артефакти кои претежно биле ископани во Италија и продадени во аукциски куќи во Германија.
Криминалните групи кои се занимавале со ваков вид трговија имале соработници во Барселона и Лондон и од страна на европската полиција биле опишани како многу добро организирани.
Операцијата се смета за една од најголемите досега кога станува збор за шверцот на артефакти од Италија.
