Анархисти преземаа одговорност за нападот со боја врз домот на познатиот композитор Микис Теодоракис, пишува грчкиот весник Катимерини.
Во пост на еден вебсајт кој е против естаблишментот тие го осудија Теодоракис, кој е еден од главните говорници на денешниот протест во Атина против името, затоа што застанал со „националистите и патриотите“ игнорирајќи ја работничката класа во земјата која секојдневно е напаѓана со разни закони и мерки.
Според полицијата, напаѓачите користеле црвена боја која ја фрлиле врз влезот на куќата на композиторот која се наоѓа во главниот град на Грција.
„Твојата приказна започна во планина и ќе заврши на националнoто тонење на плоштадот Синтагма“, напишале напаѓачите.
Микис Теодоракис е познат грчки композитор а во деведесетите бил и член на парламентот како дел од конзервативната грчка партија Нова Демократија, иако политички често бил асоциран со грчката левица поради неговите долгогодишни врски со Комунистичката партија во Грција.
Тој е познат и по пишувањето на музиката за филмовите Гркот Зорба, „З“ и „Серпико“.
