Наместо да му помагаме на нашиот сосед, ние го навредуваме со зборови како циганоскопјани. Ова го изјави градоначалникот на Солун, Јанис Бутарис, говорејќи за спорот меѓу Република Македонија и Грција.
„Ние ќе изгубиме многу од овој спор. Ќе го загубиме достоинството во НАТО и ЕУ. Не му помагаме на нашиот сосед, кој се наоѓа на крстосница како мало дете во потрага по својот идентитет. Што правиме? Ги пцуеме и ги нарекуваме циганоскопјани. Како изгледа тоа“, изјави Бутарис за локалните медиуми.
Според него, преговорите ги спроведува владата во Атина и никој нема право, вклучувајќи го и него, да ѝ каже како да преговара. Бутарис ја повтори својата позиција за решавање на спорот за името.
„Мојата позиција за ова прашање е да се прифати име според одлуките од самитот на НАТО во Букурешт во 2008 година. Второ, мора да се исполнат барањата од Привремената спогодба – таму јасно е напишано откажување од секакви иридентистички манифестации. Сето ова да се исполни во две фази. Во првата да се постигне договор за името, а во втората – во период од 3 или 5 години да се исполнат обврските од Привремената спогодба. Не е лесно да ги промениш учебниците. Тие 100 години се нарекуваа Македонци“, рече Бутарис во Солун.
