Претседателката на Хрватска, Колинда Грабар Китаровиќ, изјави дека Хрватска не била агресор во војната во 90-тите и дека нејзина цел било да се одбрани од Србија на Милошевиќ.
„Како претседателка на Хрватска јасно и недвосмислено порачувам дека вчера во Хаг не им се искажуваше пресуда на Хрватска ни на хрватскиот народ. Хрватска не е агресот и направи најмногу за опстанокот и целовитоста на Босна и Херцеговина, а хрватскиот народ прв се спротивстави на големосрпската агресија бранејќи ја својата независност“, истакна Грабар по хашката пресуда за воените лидери на босанските Хрвати.
Претседателката изрази сочувство на семејството на Слободан Праљак, кој по изрекувањето на конечната пресуда во судницата испи отров, а подоцна и умре. Додаде дека нема да му ги одзеде медалите бидејќи ги добил за „одбрана од големосрпската агресија“.
Таа најави дека во најскоро време ќе ја посети БиХ и ги повика сите да се свртат кон иднината.
