Специјалниот пратеник на ЕУ за дијалог меѓу Белград и Приштина, Мирослав Лајчак, потврди дека в четврток, 4 април, ќе продолжат разговорите во Брисел како дел од дијалогот за одлуката за укинување на динарот и изрази надеж дека преостанатите разлики ќе бидат надминати.
„Двете страни ќе се вратат во Брисел оваа недела и се надевам дека ќе успееме да ја премостиме преостанатата разлика в четврток“, рече Лајчак во пораката на „Фејсбук“.
Сумирајќи ја изминатата недела, Лајчак оцени дека претходната средба на главните преговарачи Петар Петковиќ и Бесник Бисљими на 25 март била конструктивна и дека е заклучено дека е потребна уште една средба.
„Сè на сè, тоа беше корисна средба. Двете страни имаа можност да ги образложат своите идеи и позиции. На крајот заклучивме дека ќе биде неопходна уште една средба“, рече Лајчак.
