Украинскиот претседател Володимир Зеленски изјави дека вчера со папата Франциско разговарал за формулата за мир за Украина. „Разговаравме за нашата заедничка работа на имплементација на украинската мировна формула“, рече Зеленски во објавата на „Икс“.
„Над 80 земји веќе се вклучени во овој процес на ниво на нивни претставници. И ќе има повеќе“, додаде тој. Зеленски рече дека му се заблагодарил на Франциско за неговите божиќни честитки „како и за неговите желби за праведен мир за сите нас“.
Тој најави дека следно ќе се разговара за формулата за мир на Украина во Давос, Швајцарија, но не прецизираше датум. Како дел од неговите мировни напори за Украина, Папата го испрати специјалниот пратеник, италијанскиот кардинал Матео Зупи, во Киев, Москва, Вашингтон и Пекинг.
Во својата божиќна порака Папата повика на прекин на бројните конфликти, вклучувајќи го и оној во Украина. Во ноември, повторувајќи ги неговите упорни повици за прекин на насилството во Украина и на Блискиот Исток, тој рече дека „мирот е можен“ и дека „не смееме да се откажеме“.
Во октомври, Зеленски рече дека го поканил папата во Киев. Украинскиот лидер приватно се сретна со папата во Ватикан во мај.
