Државниот инспекторат на Република Хрватска упати предупредување до потрошувачите за повлекување на прехранбениот производ Kulen 55 VP, поради утврдено присуство на опасната бактерија Listeria monocytogenes.
Овој потег доаѓа откако бактеријата, која може да предизвика сериозни инфекции, беше идентификувана во производите на Bermes d.o.o. од Доње Пушче.
Повлечениот производ има ЛОТ броеви 90061995 и 90062876, со рок на употреба на 16 септември оваа година. Бактеријата Listeria monocytogenes не е во согласност со регулативата на Европската комисија за микробиолошки критериуми за храна и претставува сериозна закана за јавното здравје.
Инфектолозите и медицинските експерти посочуваат дека листеријата има посебна склоност да го напаѓа мозочното ткиво и мозочната мембрана. Инфекцијата со оваа бактерија може да резултира со сериозни компликации како парализа на мозочните нерви и екстремитети, менингитис, енцефалитис (воспаление на мозокот) и, во најлош случај, смрт.
Според истражувањата, инфекцијата со листерија бара специфична антибиотска терапија, но стапката на смртност останува висока. Експертите предупредуваат дека вкупната смртност од инфекција со листерија се движи од 20 до 30 отсто.
Ова не е прв случај на опасната бактерија Listeria monocytogenes во прехранбените производи во Хрватска.
Ова е веќе 11-ти случај на потврдено присуство на оваа бактерија во прехранбените производи во последните 20 месеци.
Оваа ситуација ја нагласува важноста од ригорозни контроли и мерки за спречување на ширење на инфекцијата и заштита на здравјето на потрошувачите.
