Шест лица се убиени, а едно е рането во напад на градинка во јужната кинеска провинција Гуангдонг. Меѓу жртвите има и три деца, а полицијата потврди дека осомничениот е уапсен.
Меѓу жртвите има наставник, двајца родители и три деца, изјави портпаролката на градската власт.
Таа не понуди детали за идентитетот и возраста на жртвите, ниту за оружјето користено во нападот што се случи во градот Лијанџијанг.
„Еден осомничен е уапсен“, рече таа и додаде дека истрагата на полицијата е во тек.
Некои медиуми објавија фотографии од полицијата од местото на настанот. Според „Гардијан“, на местото на убиството бил поставен полициски кордон.
Инцидентот се случил околу 7.40 часот по локално време, објави државната кинеска мрежа.
Полицијата за Би-би-си изјавила дека уапсила 25-годишен маж по име Ву.
„Да се прави ова на деца што немаат моќ е срамота. Колку семејства ќе бидат уништени со ова… Јас ја поддржувам смртната казна“, рече еден корисник на „Веибо“.
Друг корисник ја доведе во прашање безбедноста на училиштата, особено по слични претходни напади.
„Зошто ваквите случаи продолжуваат да се појавуваат?“, праша тој.
