Швајцарија ќе забрани рекламирање на тутунски производи и електронски цигари на места и медиуми блиски до младите, најави владата на земјата, со што практично ќе се спроведе одлуката донесена на референдумот минатата година. Кабинетот соопшти дека новите закони ќе се применуваат од средината на 2026 година и ги зајакнуваат ограничувањата за пакување и рекламирање на тутун и електронски цигари, кои ќе стапат на сила следната година.
Построгите ограничувања уследија по успехот на референдумот „Да – заштита на децата и младите од рекламирањето на тутунот“ во февруари 2022 година, кој беше поддржан од 57 отсто од швајцарските гласачи.
Овој потег, кој треба да влијае на печатените медиуми, онлајн рекламирањето и фестивалите, е дизајниран да ја намали потрошувачката на тутун и смртните случаи поврзани со тоа.
Според владата, пушењето е сè уште релативно распространето во Швајцарија, каде што околу 9.500 луѓе годишно умираат предвреме како резултат на употребата на тутун, што се смета за еден од најголемите здравствени проблеми во земјата.
„Употребата на тутун предизвикува бројни незаразни болести, а трошоците за нивното лекување изнесуваат три милијарди швајцарски франци годишно“, објави владата, додавајќи дека рекламирањето на тутунот игра важна улога во одлуката за почеток на пушењето.
Само во Швајцарија, во 2022 година, 6,9 отсто од децата на возраст од 11 до 15 години пушеле цигари во последните 30 дена, додека 5,7 отсто од младите на возраст од 15 до 24 години користеле електронски цигари најмалку еднаш месечно.
Во иднина нема да биде дозволено рекламирање на тутунски производи или електронски цигари во печатени медиуми, продавници или настани што може да ги посетат малолетници. Рекламирањето на мрежите ќе продолжи да биде дозволено доколку се воспостават системи за контрола на возраста на корисниците.
