Истражувачка ракета лансирана рано во понеделникот од страна на Sweden Space Corp (SSC) од вселенскиот центар Есранџ во северна Шведска не функционираше и слета на 15 километри во соседна Норвешка.
Ракетата достигна височина од 250 километри каде што беа спроведени експерименти во нулта гравитација, се вели во соопштението на агенцијата.
– Падна во планините на височина од 1.000 метри и на 10 километри од најблиската населба – изјави за Ројтерс Филип Олсон, шеф за комуникации во SSC.
Шведската вселенска корпорација (SSC), која го поседува и раководи центарот, се извини и води истрага. Но Норвешка ја критикуваше Шведска што официјално не ги информирала.
– Ова е отстапување што го сфаќаме сериозно. Сè уште е рано да се шпекулира за причината и чекаме повеќе информации од актуелната истрага – изјави Марко Кохберг од вселенскиот центар Есранџ.
SCC соопшти дека норвешките и шведските власти биле контактирани веднаш по инцидентот. Но, норвешкото Министерство за надворешни работи соопшти дека не било соодветно известено ниту за слетувањето на ракетата, ниту за враќањето на нејзината носивост и дека сериозно ја сфаќа секоја неовластена активност во своите граници.
– Кога ќе дојде до вакво прекршување на границата, клучно е одговорните веднаш да ги известат надлежните норвешки органи преку соодветни канали – се наведува во соопштението.
Ракетата, позната како Тексус-58, е дел од европската програма нарачана од Европската вселенска агенција.