Претседателот на Република Турција, Реџеп Таип Ердоган, за време на средбата со генералниот секретар на НАТО, Јенс Столтенберг, рече дека не е Турција таа што ги зголемува тензиите во регионот и дека би било добро Грција да дејствува разумно и да се вклучи во дијалог.
Канцеларијата за комуникации на турското претседателство соопшти дека на денешната средба меѓу Ердоган и Столтенберг се разговарало за војната меѓу Русија и Украина, агресивната акција на Грција и трипартитниот меморандум меѓу Турција, Шведска и Финска.
На средбата Ердоган истакна дека како резултат на дипломатскиот сообраќај што го постигнале на највисоко ниво со Русија и Украина, повторно почнал да функционира коридорот за жито и дека во наредниот период ќе се фокусираат на продолжување на договорот. Ердоган рече дека е неопходно да се вратат на преговорите за што поскоро да се прекинат конфликтите меѓу Русија и Украина и да се постигне праведно решение.
Зборувајќи за однесувањето на Грција, Ердоган рече дека „не е Турција таа што ги зголемува тензиите во регионот и дека би било добро Грција да постапи разумно и да се вклучи во дијалог“.
Турскиот претседател Ердоган исто така рече дека темпото и времето на процесот на ратификација на трилатералниот меморандум Турција-Шведска-Финска ќе се определат со чекорите што треба да ги преземат овие земји.
