Албанија ги прекина дипломатските односи со Иран и им нареди на иранските дипломати и на персоналот на Амбасадата да ја напуштат земјата во рок од 24 часа поради сајбер-нападите, кои се случија во јули за кои Тирана го обвини Техеран.
Албанскиот премиер Еди Рама рече дека овој екстремен одговор е целосно пропорционален на сериозноста и ризикот од сајбер-напад, кој се заканувал да ги осакати јавните услуги, да ги избрише дигиталните системи и да ги хакира владините записи, да ги украде владините електронски комуникации на интранетот и да ослободи хаос и несигурност во земјата.
„Советот на министрите одлучи веднаш да ги прекине дипломатските односи со Иран“, рече Рама.
Како што оцени, нападот не бил успешен.
„Штетата може да се смета за минимална во споредба со целите на агресорот. Сите системи повторно беа целосно функционални по нападот и ниту еден податок не беше неповратно избришан“, објасни тој.
Во јули во Албанија се случи сајбер-напад, кој привремено ги парализира владините веб-страници, а онлајн-владините служби мораа да бидат затворени.
Минатиот месец фирмата за сајбер-безбедност Mandiant оцени дека нападот во јули го извршил Иран, иако многу американски медиуми пишуваа дека, најверојатно, Русија стои зад нападот.
