Рускиот претседател Владимир Путин предупреди дека Москва ќе нападне нови цели доколку САД ѝ достават ракети со долг дострел на Украина, јавуваат руските државни медиуми.
Доставувањето ново оружје за Киев има за цел само „да го одолговлекува вооружениот конфликт што е можно подолго“, рече Путин во интервју за ТВ каналот „Россија-1“, пренесе рускиот државен медиум ТАСС.
Во случај на испорака на ракети со голем дострел за Киев, Русија ќе извлече „соодветни заклучоци“ и ќе ги нападне оние „објекти“ што сè уште не ги гаѓале, рече тој.
„Доколку се снабдени, ќе извлечеме соодветни заклучоци од ова и ќе употребиме сопствено оружје, од кое имаме доволно, за да ги нападнеме објектите што сè уште не ги таргетиравме“, рече Путин коментирајќи ја ситуацијата во врска со снабдувањето со американски повеќекратни ракетни системи за лансирање (MLRS) кон Украина.
Доставувањето американски MLRS на Украина во суштина не менува ништо, бидејќи Киев претходно имаше слично оружје, вклучително и ракети со сличен дострел, така што тие едноставно ги надоместуваат нивните загуби, рече Путин, пренесе ТАСС.
Американскиот претседател Џо Бајден изјави во вторникот дека САД ѝ обезбедуваат на Украина „понапредни ракетни системи и муниција“ додека нејзината војна со Русија продолжува, објави Си-Ен-Ен..
