Портпаролот на Кремљ Дмитриј Песков денеска откри дека четвртиот круг преговори меѓу Русија и Украина наводно ќе продолжи утре.
Иако во медиумите се појавија информации дека се водат преговори, Песков ги демантираше овие тврдења, велејќи дека средбата на руската и украинската делегација е закажана за утре.
Песков вчера изјави дека разговорите лице в лице меѓу Москва и Киев за конфликтот во Украина ќе продолжат преку видео врска.
Претходно денеска зборуваше и членот на украинскиот тим Михаило Подољак кој рече дека натамошни разговори меѓу Русија и Украина би можеле да се одржат следната недела.
– Штом ќе се разработат меѓусебните правни формати, ќе биде закажана средба – четврта рунда преговори. Тоа може да биде утре, задутре – рече Подољак претходно денеска во изјава за Белоруската државна новинска агенција Белта.
Тој додаде дека на преговарачката маса ќе има различни предлози, меѓу кои политичко решение и најважно, воено.
– Мислам на прекин на огнот, формула за прекин на огнот и повлекување на војниците. Веројатно нема потреба да одите понатаму и само да разговарате. Разговаравме за сите прашања, сега се обидуваме тие прашања да ги спакуваме во некои правни формати – рече Подољак.
Потсетуваме, членот на рускиот преговарачки тим Леонид Слуцки изјави дека споредено со почетокот на преговарачкиот процес, Москва и Киев постигнале значителен напредок во постигнувањето резултати.
Првите три рунди преговори се одржаа во Белорусија.
