Светската здравствена организација (СЗО) соопшти дека ги истражува наводите дека регионалниот директор на организацијата во Азија малтретирал персонал, користел расистички јазик и изнел чувствителни податоци за вакцините во Јапонија.
Во соопштението доставено до „Ројтес“, СЗО наведува дека е „свесна за обвинувањата и дека ги презема сите соодветни чекори за да продолжи да работи на тоа прашање“.
Изјавата на СЗО уследи по извештајот на АП во кој се цитира внатрешна жалба од „загрижениот персонал на СЗО“ до повисокото раководство во кое се обвинува Такеши Касаи, регионален директор на СЗО задолжен за Западен Пацифик.
