Управата за јавни приходи преку проектот „Мој ДДВ“ како дел од ДДВ-то искажано во фискалните сметки во изминатите две години на 399.000 корисници им исплати над две милијарди денари, односно 36,3 милиони евра, соопшти СДСМ.
„Преку ‘Мој ДДВ’ во првата година вратени се над 670 милиони денари, а во втората година од повратот на ДДВ преку скенирани фискални сметки 1,5 милијарда денари завршија назад во семејните буџети на граѓаните.
Речиси 414 милиони денари им се исплатени на граѓаните само во првите три месеци од оваа година. Веќе неколку месеци за купени македонски производи се враќа дел од ДДВ во висина од 20 %, што значи директна помош за домашната економија.
Постојаниот раст на бројот на корисници на апликацијата „Мој ДДВ“ е силна потврда дека ова е еден од најдобрите и најуспешни проекти на Владата предводена од СДСМ.
Граѓаните со сигурност знаат дека на секои три месеци се исплаќа повратот на ДДВ-то на нивните трансакциски сметки, но знаат и дека на тој начин даваат придонес во борба против сивата економија.
Како одговорна партија продолжуваме да создаваме и спроведуваме мерки и политики за унапредување на квалитетот на животот на сите граѓани“, се наведува во партиското соопштение.
