Филмот „Сестра, брат и шахта“ на Милчо Манчевски ја освои главната награда на 39. Меѓународен филмски фестивал во Токио. Признанието „Токио Гран при“, кое го носи и името на гувернерот на Токио, беше доделено на денешното затворање.
Жирито, предводено од австралискиот режисер Ролф де Хер, го издвои спојувањето на хуморот, трагедијата и драмата и односот кон филмските ликови. Делото беше меѓу 15-те филма во главната натпреварувачка програма.
На церемонијата наградата ја подигнале актерите Сара Климоска и Филип Трајковиќ и продуцентот Јане Ќортошев. Филмот ја следи приказната на брат и сестра на општествените маргини во современо Скопје.
