Перспективата за постигнување на реален исчекор во процесот на европската интеграција на Република Северна Македонија, била во фокусот на денешната средба на премиерот Зоран Заев и претседателот на Бугарија Румен Радев на завршницата на Самитот на НАТО во Брисел изјави македонскиот премиер во разговор за Телма.
-Бугарскиот претседател Радев ја подвлече принципиелната и континуирана поддршка за иднината на Република Северна Македонија во ЕУ, како и очекувањето на Бугарија за непосреден и активен политички дијалог низ кои ќе бидат разрешени отворените прашања во меѓусебните односи, како и заедничката волја за постигнување одржливи резултати во градењето добрососедски односи меѓу Бугарија и Северна Македонија, за исполнување на очекувањата на граѓаните во двете земји, појасни Заев.
Според него билатералното партнерство во областа на безбедноста и одбраната, и можноста за проширување на соработката во областа на воената обука и размената на кадети меѓу двете земји, но и економските придобивки од португалскиот предлог се едни од најважните цели кои двете земји треба да ги спроведат во иднина.
-Разговаравме со Радев, не смееме да ги креваме очекувањата бидејќи се работи за техничка влада, услови во кои нема парламент во Бугарија и не очекувам нешто драматично да се случи но многу е важно да правиме се, особено поради поддршката што ја имаме од светските демократски лидери, но важно е да се знае дека со Бугарија имаме билатерален проблем кој мора билатерално да го решаваме, и верувам дека ќе бидеме доволно мудри и пред се одговорни, двете страни, не зборувам само за нашата страна, затоа што сум убеден како што е аспирација на нашата страна да се членува во ЕУ, така е и цел градење на пријателски односи со сите наши соседи вклучително Бугарија и бугарскиот народ, тврдам дека тоа е и обратно и верувам дека за овој сосед исто така е желба Северна Македонија да продолжи на европскиот пат затоа што тоа носи преидобивки за двете земји, рече Заев.
Заев најави дека очекува храброст и европско лидерство, но и дека не треба да се откажеме од евроспкиот пат поради ова прашање бидејќи сите аргументи се на страна на Република Северна Македонија во постигнувањето на решение.
