За време на првиот говор во Конгресот по повод првите 100 дена од претседателскиот мандат, американскиот претседател Џо Бајден посебно внимание посвети на Кина и оцени дека таа земја бргу се приближува.
Во средата вечерта американсиот претседател порача дека САД ќе одржат силно присуство во Пацификот и вети дека ќе го интензивираат технолошкиот развој и трговијата, пренесува „Ројтерс“.
„Кина и другите земји бргу се приближуваат. Ние мора да се развиваме и да доминираме во производството и технологијата на иднината“, порача Бајден.
Во изјавата што го предизвика најсилниот аплауз на вечерта, Бајден рече дека, едноставно, нема причина зошто ветерни турбини да не се прават во Питсбург наместо во Пекинг.
Бајден повтори дека конкуренцијата со Кина е најголемиот предизвик во надворешната политика на САД.
Тој и неговите колеги демократи, како и републиканците, се согласија за построг пристап во односите со Пекинг.
„Америка ќе се бори против неправдите што ги поткопуваат американските работници и американската индустрија преку субвенции за државни компании и спречување кражба на американски технологии и интелектуална сопственост“, додаде американскиот претседател.
Тој му порача на кинескиот претседател Шји Џјинпинг дека Соединетите Американски Држави ќе одржат силно присуство во индопацификот, како што тоа го прави за НАТО во Европа – на за да почне конфликт, туку да го спречи.
