Училиштата и градинките во повеќето сојузни германски држави од денеска повторно ги отвораат вратите за учениците од пониските училишта и матурантите со строги хигиенски правила и почитување на пропишаните мерки, информираат германските медиуми.
„Добро е што многу училишта сега постепено воведуваат часови со присуство на ученици во училиштата. Децата, особено помладите, имаат потреба едни од други”, изјави федералната министерка за образование Ања Карличек.
Таа апелираше до родителите и наставниците да се придржуваат до сите мерки за да се спречи ширењето на коронавирусот.
„Последните случувања со епидемиолошката состојба со повторното појавување на бројот на нови инфекции и ширењето на мутирани видови на коронавирусот бараат претпазливост“, рече Карличек.
Кабинетот, кој ги обединува министрите одговорни за борба против пандемијата, денеска дискутираше и за масовното спроведување на тестовите како дополнителна мерка во процесот на нормализирање на работата на училиштата и градинките.
Од денеска, спортот на отворено во Германија е повторно дозволен, но само за луѓе од едно домаќинство во присуство на едно лице од друго домаќинство.
