Боливиските лекари бараат владата да воведе строго затворање на земјата и се закануваат дека ќе престанат да примаат нови пациенти, бидејќи има нагло зголемување на случаите на Ковид-19, при што просечно умира по еден лекар на ден, а здравствениот систем е пред пукање.
Бројот на нови дневни случаи на коронавирус во Боливија, која вчера ја прими првата серија руски вакцини „спутник V“, достигна рекорд од 2.866 оваа недела, а бројот на смртни случаи поврзани со Ковид-19 се искачи на над 10.000.
Агенцијата известува дека во моментов има голема навалица пред и во болниците во боливиските градови, а натписите на вратите и sидовите ги предупредуваат сите дека нема место за нови пациенти.
„Со ваков брз развој на настаните ќе дојде до целосен колапс, ќе имаме пациенти кои умираат на улица, а медицинскиот персонал нема да може да им помогне“, изјави Рикардо Ландивар, директор на медицинскиот факултет Ла Паз, наведува агенцијата.
„Ројтерс“ исто така известува дека синдикатите на здравствените работници и лекарите бараат од претседателот Луис Арсе да запре сè додека не помине сегашниот бран на Ковид-19, но владата се двоуми дали да преземе строги мерки за да не дојде до понатамошно нарушување на и онака лошата економска состојба во земјата и се надева дека пристигнувањето на руската вакцина ќе им помогне на Боливијците да дишат полесно.
Сепак, лидерите на медицинските синдикати укажуваат на високата стапка на инфекција и морталитет, потврдено е дека во земја со 11,5 милиони жители досега се разболеле 210.000 лица и велат дека секој ден умира по еден лекар или здравствен работник.
„Лекарите умираат од ден на ден“, изјави за агенцијата Патриша Алманза, лекар во болницата „Петролеро“ во Ла Паз.
