Сите залихи на лекот ремдесивир, кој е еден од ретките што покажаа позитивни резултати во лекувањето на коронавирусот, се откупени од страна на САД. Во следните три месеци лекот нема да биде достапен за ниту една друга држава.
Лекот што го произведува фирмата „Гилијад“ досега имаше ефекти во лекување пациенти заболени од коронавирус и во нивното побрзо закрепнување. Првите 140.000 дози од лекот веќе се потрошени. Администрацијата на Трамп ги откупи следните 500.000 дози, што е всушност целото производство на „Гилијад“ до крајот на септември годинава.
Лекот ремдесивир беше наменет за лекување од вирусот ебола, но се покажа неуспешен. „Гилијад“ одлучи да ја понуди терапијата со лекот на пазарот по цена од 2.300 долари за пациент, што предизвика остри реакции кај експертите и политичарите во САД и други земји.
