Јапонската компанија „Фемили романс“ нуди услуги на изнајмување пријатели и членови на семејство, а од неодамна може да изнајмите и помлада сестра.
Компанијата не изнајмува деца, но за помлада сестра може да понуди возрасна млада девојка за цена од 135 американски долари за три часа дружење, пренесува порталот „Сора њуз“.
Како дел од првичното барање од клиентите се бара да го наведат датумот на кој сакаат да ја изнајмат својата сестра, каде сакаат да се запознаат и на кои места ќе одат за време на терминот (забрането е отстапување од наведеното, како и барања за прекумерен физички контакт). Клиентите може да постават барање во врска со возраста, изгледот или личноста. „Фемили романс“ обично бара од клиентите да останат на јавни места со своите т.н. сестри.
Иако идејата е бизарна, „Фемили романс“ е само една во низата компании што се појавуваат во Јапонија, чија дејност е изнајмување луѓе за одредени семејни и пријателски улоги. Компаниите нудат сè, од состаноци за вечера до изнајмување посетители за погреб.
