Специјалниот пратеник на ОН за Сирија, Геир Педерсен, нема да присуствува на претстојниот меѓународен состанок за Сирија во Нур Султан, соопшти во средата Министерството за надворешни работи на Казахстан, пренесува ТАСС.
„Со жалење можеме да кажеме дека специјалниот претставник на генералниот секретар на ОН за Сирија, Геир Педерсен, ќе биде принуден да ги прескокне претстојните разговори поради здравствени причини. Делегацијата на ОН ќе ја предводи неговиот заменик“, се вели во изјавата на прес-службата на Министерството.
Во претходните извештаи се вели дека Педерсен претрпел повреда на окото и лекарите му рекле дека треба да избегнува патување во блиска иднина.
На претстојната средба ќе присуствуваат делегација на сириската влада предводена од сирискиот претставник во ОН, Башар Џафари, и на вооружената опозиција предводена од Ахмад Тума.
Сите поканети страни го потврдија своето учество. Русија ќе ја претставува претседателскиот пратеник за Сирија, Александар Лаврентјев. Турската и иранската делегација ќе бидат предводени од заменик-министерот за надворешни работи, Седат Онал, и високиот помошник за политички прашања на сирискиот министер за надворешни работи, Али Азгар Каџи.
13. меѓународна средба на високо ниво за Сирија во рамките на процесот Астана ќе се одржи во Нур Султан на 1 и 2 август. На неа се очекува да учествуваат делегации на нациите гаранти – Иран, Русија и Турција – како и сириската влада и сириската вооружена опозиција.
Претставници на високо ниво од ОН, Јордан, Либан и Ирак беа поканети да бидат набудувачи на разговорите. Делегациите на Ирак и Либан првпат ќе учествуваат во преговарачкиот процес Астана.
Претставници на Меѓународниот комитет на Црвениот крст и на кабинетот на високиот комесар за бегалци на Обединетите нации (УНХЦР) ќе пристигнат во Нур Султан за да учествуваат на состанокот на работната група за ослободување на заложниците и притворените лица што се држат на маргините на разговорите во Сирија.
На првиот ден, зад затворени врати, ќе се одржат билатерални и мултилатерални технички консултации, а следниот ден ќе се одржи пленарна средба. Резултатот од дводневните разговори ќе биде сумиран во заедничка изјава на земјите гаранти на процесот Астана.
