Дилер од Богданци одгледувал и криел марихуана во домот на неговата баба. Против него е покренато обвинение за неовластено производство и пуштање во промет наркотични дроги, психотропни супстанции и прекурсори, соопшти Основното јавно обвинителство Велес.
Според информациите на Обвинителството, станува збор за лице на 27-годишна возраст од селото Селемли.
На 23 мај годинава, при претрес во домот на бабата на обвинетиот, во две неупотребливи машини за перење пронајдени биле четири најлонски кеси марихуана. Во дворот на куќата, пак, обвинетиот чувал 24 млади исушени растенија од видот канабис сместени во пластични чаши и саксии. Обвинителството утврди дека обвинетиот неовластено заради продажба држел дрога марихуана со вкупна тежина од 912,60 грама и 24 млади исушени стебла канабис.
