Американскиот Конгрес денеска ја почна својата прва седница во новиот состав по парламентарните избори, со рекорден број на жени и претставници на малцинствата.
Американскиот потпретседател, републиканецот Мајк Пенс, ја отвори седницата на Сенатот, додека во Претставничкиот дом тоа беше демократката Ненси Пелоси. Таа во текот на седницата треба да биде повторно избрана за претседател на долниот дом на Конгресот, каде што мнозинството го чинат демократите.
Ненси Пелоси (78) беше претседателка на Претставничкиот дом од 2007 до 2010 година, а тогаш беше првата жена во американската историја на таа позиција.
Конгресот почнува да работи во амбиент на несогласување со Белата куќа за буџетот и финансирањето на ѕидот на границата со Мексико, поради што од 22 декември владее делумна блокада во работата на сојузните органи.
