По неуспешните преговори меѓу републиканците и демократите Владата на САД од полноќ е делумно блокирана. Станува збор за спорот околу ѕидот, кој тежи пет милијарди долари, а кој треба да се постави на границата со Мексико, за кој претседателот на САД Доналд Трамп од Конгресот бара доделување на парите.
Откако не беше постигнат договор за буџетот, лидерите на Конгресот и Белата куќа ветија дека ќе ги продолжат преговорите и за време на викендот во потрага по договор, кој доколку се постигне ќе доведе до прекин на блокадата на Владата во пресрет на божиќните празници. Како што пренесува Ројтерс, Трамп во четвртокот ги притиснал републиканците Претставничкиот дом на Конгресот да го искористат законскиот предлог за краткорочно финансирање на администрацијата и преку него да ги, како што пренесува Ројтерс „протнат“ потребните пет милијарди долари за подигање на ѕидот на границата со Мексико, и покрај противењето на демократите.
Претходно Претставничкиот дом на американскиот Конгрес одобри буџет во кој е вклучено финансирање на ѕидот на границата со Мексико што го бара претседателот Доналд Трамп, но тој буџет не помина во Сенатот.
Демократите кои се против ѕидот на границата со Мексико, пред неколку дена најавија дека при гласањето во Сенатот ќе отфрлат секаков буџет во кој има негово финансирање, тие иако се малцинство во Сенатот сепак имаат доволно гласови да не го изгласаат буџетот усвоен од Претставничкиот дом.
А американскиот претседател, Доналд Трамп пак пред извесен период најави дека ќе потпише буџет само ако содржи финансирање на ѕидот.
