СДСМ во изминатите 2 години во кои е на власт докажа дека воопшто не се грижи за младите во Македонија. Ниту едно од ветувањата не е остварено. Напротив, постојано сме сведоци на нови кратења во инвестициите за креирање можности за младите, обвини Лука Кржаловски, претседател на УМС на ВМРО-ДПМНЕ.
„Негрижата на СДСМ за младите се покажа и со последниот ребаланс на буџетот. Со ребалансот СДСМ крати од оние сектори што се најважни за младите во Македонија, и тоа цели 7 милиони евра!
Владата на СДСМ крати цели 170 милиони денари за изградба и реконструкција на студентските и ученичките домови. 48 милиони денари помалку средства ќе има за превод на книги од реномирани автори, а дури 87 милиони се кратат од средствата планирани за изградба и реконструкција на основни училишта.
Тоа не е сè. Владата на СДСМ крати 30 милиони денари од парите наменети за изградба на училишни спортски сали, 43 милиони денари помалку ќе има за изградба и реконструкција на средни училишта, како и 50 милиони денари помалку за спортски објекти.
Да повторам, тоа се над седум милиони евра помалку за младите луѓе во Република Македонија!
Затоа и резултатите се поразителни. Македонија е на трето место во светот по младинска невработеност. Повеќе од 50 проценти од младите немаат работа иако повеќето од нив се и високо образовани. Штетните политики на СДСМ кон младите предизвикуваат егзодус на младите од државата. За младите не дојде животот што им го ветуваше Заев.
Но, за ВМРО-ДПМНЕ младите се врвен приоритет. Ние точно знаеме што им недостига на младите и тоа ќе биде дел од партиската програма во наредниот период. Ќе ја вратиме надежта кај младите дека Македонија ќе победи. Младите ќе победат“, рече Кржаловски.
