Потребно да се пронајде нова причина за да се оправда постоењето на Европската Унија, така што ќе ѝ се даде визија и ќе се реформираат нејзините институционални системи, рекол грчкиот министер за надворешни работи на состанокот со колегите од вишеградската група и четири балкански членки на ЕУ во Сунио. Според Коѕијас, целта на ЕУ мора да биде да им служи подобро на своите граѓани и да се зајакне блокот во светот што се менува фокусирајќи се на луѓето и опкружувањето, пренесе грчката агенција АНА.
„Сакаме Европа која е пообединета, подемократска и социјално праведна. ЕУ, која е посилна во светот и се грижи за своите граѓани“, рекол Коѕијас.
Според него, таквата ЕУ би требало да биде заснована на принципот супсидијарност, кој обезбедува демократско учество на државата, регионот, а особено на граѓаните и ги надминува разликите внатре во себе, меѓу Југот и Северот, Западот и Истокот, богатите и сиромашните подрачја.
Зборувајќи за иднината на Европа, Коѕијас се осврнал на кризата и недостатоците на блокот, укажал на потребата за поголема демократија внатре во институциите на ЕУ и на клучни прашања и загрижености во врска со внатрешните функционирања и односите со државите за проширувањето, како и глобалната улога на ЕУ, нејзината меѓународна стратегија и надворешната и одбранбената политика.
Министрите за надворешни работи од вишеградската група и четири балкански членки на ЕУ се состанаа во Сунио, јужно од Атина, во пресрет на самитот во Софија следната недела, каде што разговараа за енергетика, иднината и проширувањето на Европската Унија.
На состанокот учествуваа шефовите на дипломатиите членки на вишеградската група – Полска, Чешка, Словачка и Унгарија, како и министрите на Грција, Бугарија, Романија и на Хрватска.
На состанокот како набљудувачи беа повикани и министрите за надворешни работи на земјите што чекаат да влезат во ЕУ – Македонија, Србија, Црна Гора и Албанија, како и нивните колеги од Словенија и Кипар.
