До крајот на овој месец министрите за надворешни работи на Македонија и на Грција, Никола Димитров и Никос Коѕијас, ќе имаат нова средба. Точниот датум сè уште не е утврден, рече портпаролот на Владата, Миле Бошњаковски.
„Сè уште сме големи оптимисти и разговорите ќе продолжат со истата динамика. Бараме решение кое ќе биде достоинтвено за граѓаните на двете држави“, рече Бошњаковски.
Последната средба на Димитров и Коѕијас се одржа на 12 април во Охрид. Македонскиот министер тогаш изјави дека разговарале за сите прашања и ставови кои ја прават разликата во спорот за името. „Од денешната средба има напредок, но сè уште постојат разлики и неусогласени ставови“, рече Димитров. Тој истакна дека на средбата за прв пат се разговарало за временската рамка и чекорите како ќе се имплементира решението за проблемот со името.
