Во близина на воениот штаб и амбасадата на Франција во престолнината на Буркина Фасо, одекна експлозија и се слушна пукање, јави Би-Би-Си.
Според зборовите на сведоците, од еден автомобил излетале вооружани мажи и отвориле оган, а на фотографиите што се појавија по медиумите се гледа густ чад. Владата го потврди нападот и соопшти дека четворицата напаѓачи биле неутрализирани.
Францускиот амбасадор во земјата напиша на „Твитер“ дека во тек е напад, додека амбасадата во САД ги советуваше нејзините граѓани да побараат засолниште.
Како што се наведува, засега не е јасно кој стои зад нападот.
