Во Полска почна обуката на украинските пилоти за летање со авиони Ф-16, соопшти денеска шефот за надворешна политика на ЕУ, Жозеп Борел, откако САД дадоа зелено светло, пренесува „Еурактив“.
„Среќен сум што конечно почна обуката на пилотите за Ф-16 во неколку земји…на пример во Полска. Ќе биде потребно време, но колку побрзо, толку подобро“, рече Борел на состанокот на министрите за одбрана на ЕУ во Брисел.
Европски дипломат, кој сакал да остане анонимен, потврдил за АФП дека во Полска започнала обуката на украинските пилоти, но полското Министерство за одбрана во Варшава одбило да коментира.
Холандската министерка за одбрана Кајса Олонгрен на состанокот рече дека коалицијата на западноевропските поддржувачи на Киев сака да почне со обука на украински пилоти на борбени авиони Ф-16 „што е можно поскоро“.
Потегот доаѓа откако американскиот претседател Џо Бајден минатата недела даде зелено светло за пилотите на Киев да бидат обучени за американските авиони за кои Украина вели дека ѝ требаат за борба против руската инвазија.
Бајден рече дека добил апсолутна гаранција од украинскиот претседател Володимир Зеленски дека нема да ги користи борбените авиони Ф-16 за да оди на руска територија.
САД ги замрзнаа разговорите за обезбедување напредни авиони за Киев поради загриженоста за долгата временска рамка, високата цена и можноста за ескалација на тензиите со Русија.
Иако САД нема да испратат свои Ф-16 во Украина, неколку земји, вклучувајќи ги Велика Британија, Белгија, Холандија и Данска, рекоа дека ќе испратат авиони.
Полска со месеци вели дека е подготвена да ги обучува украинските пилоти. Полската армија има 48 авиони Ф-16, но веројатно ќе се согласи да ѝ ги даде тие авиони на Украина дури откако ќе ги добие Ф-35 и ќе ги стави во употреба на нивно место.
Олонгрен вели дека обуката ќе биде првиот чекор кон евентуалното снабдување со западни авиони за Киев.
„Ќе продолжиме да разговараме со нашите сојузници и со земјите кои би можеле да имаат Ф-16 достапни за следниот чекор, но тоа не е на маса во моментов. Тоа е во следната фаза“, рече таа.
