Алијансата на НАТО денеска ја започна својата редовна нуклеарна вежба наречена “Steadfast Noon”, која ќе опфати тренажни летови над јужна Европа, во која ќе учествуваат импресивни 60 авиони. Овие маневри обединуваат 13 сојузнички земји, вклучувајќи го и пристигнувањето на американските бомбардери Б-52 од Соединетите Американски Држави.
Целта на вежбата
Од НАТО истакнаа дека оваа година летовите ќе минуваат над Хрватска, Италија и Средоземното Море. Вклучени се различни типови на авиони, вклучително и конвенционални авиони, авиони за надзор и оние кои се специјализирани за полнење гориво.
Генералниот секретар на НАТО, Јенс Столтенберг го коментираше почетокот на вежбата и ја истакна нејзината цел.
– Нашата вежба ќе помогне да се обезбеди кредибилитет, ефективност и безбедност на нашето нуклеарно одвраќање. Тоа испраќа јасна порака дека НАТО ќе ги заштити и брани сите сојузници – нагласи Столтенберг
Стратешки концепт
Важно е да се напомене дека вежбата ќе вклучува борбени авиони способни да носат нуклеарни боеви глави, но овој пат нема да се користат вистински нуклеарни бомби. Вежбата не е поврзана со тековните настани и поголемиот дел од обуката се одвива на најмалку 1.000 километри оддалеченост од границите на Русија.
– Стратешкиот концепт на НАТО јасно дефинира дека главната цел на нуклеарните капацитети на НАТО е зачувување на мирот, спречување на принуда и одвраќање на агресија – посочија од НАТО.
Според официјалниот план, се очекува вежбите да траат до 26 октомври.
