Двајца мажи се во болница во тешка состојба по серијата напади со нож на крајот на карневалот во Нотинг Хил, соопшти лондонската Метрополитен полиција. Тие соопштија дека 29-годишен маж е во критична состојба во болницата по прободувањето со нож на Ворфилд Роуд синоќа кратко по 21 часот.
Уште еден 19-годишник е во сериозна, но стабилна состојба во болница, откако бил избоден со нож во Ладброук Гроув нешто пред 20 часот. Полицијата соопшти дека уште шест мажи, на возраст од 18, 19, 20, 25, 28 и 40 години, се здобиле со убодни рани кои не биле опасни по живот во одделни инциденти во понеделникот вечерта.
Имаше 275 апсења во текот на двата дена од карневалот, од кои 165 беа уапсени во понеделникот за низа прекршоци, вклучувајќи поседување ладно оружје, напади врз полицајци, поседување дрога и сексуални престапи.
Заменик-помошникот на полицискиот комесар Аде Аделекан, кој ја надгледуваше полициската операција, рече: „Жално е што втора година по ред на карневалот е обележана со сериозно насилство“.
