Смртта на италијанскиот политички ветеран и поранешен премиер Силвио Берлускони, најверојатно, ќе ја оспори кохезијата на коалициската влада во земјата. Уште поголем раздор се наѕира во кабинетот на премиерката Џорџија Мелони по смртта на лидерот на партијата Форца Италија на 86-годишна возраст. Берлускони се сметаше за модератор и помирувач во десничарската коалиција во Рим.
„Сигурно ќе биде потешко бидејќи успеа да ги натера сите да се согласуваат, да размислуваат на ист начин“, рече Матео Салвини, вицепремиер и шеф на десничарската популистичка партија Лига. Лигата на Салвини е многу помал партнер во коалиција на Мелони, но нешто поголема од Напред Италија, која Берлускони ја основаше и ја водеше до неодамна.
Кога италијанските медиуми ја прашаа Мелони дали владата ќе успее да избегне борба без Берлускони како лепило меѓу партиите, таа одговори: „Ние му го должиме тоа“. „Едно е јасно – прашањето е колку долго Напред Италија ќе има иднина без Берлускони“, смета Нино Галети, шеф на германскиот политички тинк-тенк од канцеларијата на Фондацијата „Конрад Аденауер“ во Рим.
Партијата со години губи гласачи и претставници, само Берлускони во последно време ја одржуваше заедно благодарение на неговата харизма и сеќавањето на претходните успеси. Галети рече дека може да предвиди две сценарија – едното е дека италијанскиот министер за надворешни работи Антонио Тајани засега успева да ја спаси партијата.
„Или Напред Италија бргу ќе се распадне бидејќи многу претставници пребегнуваат во други партии. Тешкото јадро, веројатно, ќе остане, но тогаш тие ќе бидат сè повеќе политички ирелевантни“, рече Галети.
Ако партијата на Берлускони се распадне, Мелони би можела да ја искористи за да ги придобие гласачите. Изгледите се добри, на последните парламентарни избори партијата на Берлускони веќе освои голем број гласови, велат познавачите.
