Европскиот парламент повика на уште посилни санкции на ЕУ против Русија, вклучително и целосен прекин на увозот на енергенси од таа земја, а да се вклучи и сојузникот на Кремљ, Белорусија.
Во резолуцијата усвоена денеска со 513 гласа „за“, 22 „против“ и 19 „воздржани“, европратениците повикаа на дополнителни санкции против Русија, вклучително и итно целосно ембарго за увоз на руска нафта, јаглен, нуклеарно гориво и гас што е можно поскоро, известија од Европскиот парламент.
Ова треба да биде придружено со план за гарантирање на безбедноста на снабдувањето со енергија во ЕУ, како и стратегија за запирање на санкциите доколку Русија преземе чекори за враќање на независноста, суверенитетот и територијален интегритет на Украина во нејзините меѓународно признати граници и притоа целосно да ги отстрани своите војници од земјата.
Постојните санкции сега мора целосно и ефективно да се применат низ целата ЕУ и меѓународните сојузници на ЕУ како приоритет, велат пратениците.
Тие ги повикаа лидерите на ЕУ да ја исклучат Русија од Г20 и другите мултилатерални организации, како што се УНХРЦ, Интерпол, Светската трговска организација, УНЕСКО и други.
