Европското единство разбудено од руската агресија против Украина ги зголемува надежите дека со дополнително внимание и поддршка Европската Унија ќе се сврти кон Западен Балкан и ќе продолжи со политиката на проширување, изјави денеска црногорскиот претседател, Мило Ѓукановиќ, по разговорите со кипарскиот претседател, Никос Анастасијадес, за време на неговата прва посета на Подгорица.
Ѓукановиќ рече дека тоа е пат кон стабилност и европска конкурентност на глобалната сцена.
Тој истакна и дека официјалните посети ја зајакнуваат позицијата на Црна Гора.
„Охрабрувачки е што по оваа непријатна ситуација што сите ние во Европа ја чувствуваме преку руската агресија врз Украина, се разбуди европското единство. Ова поттикнува надеж дека со дополнително внимание и повеликодушна поддршка ЕУ ќе се сврти кон Западен Балкан и ќе продолжи со својата политика на проширување. Мислам дека тоа е пат кон стабилност и европска конкурентност на глобалната сцена“, рече Ѓукановиќ.
Поради руската агресија врз Украина, Европската Унија ќе има нова политика во однос на Западен Балкан, смета и претседателот на Кипар, Никос Анастасијадес.
На заедничката прес-конференција со Ѓукановиќ тој оцени дека Европа покажала голема обединетост по руската агресија.
