Украинскиот министер за здравство, Виктор Лијашко, изјави дека во последните две недели од почетокот на руската инвазија на Украина најмалку 60 болници биле оштетени од руските воздушни напади и гранатирање, пренесува „Скај њуз“.
Тој додава дека петмина здравствени работници биле убиени.
Украинската страна вчера објави дека три лица загинале кога руски проектил го погодил породилиштето во Мариупол. Сепак, руската армија тврди дека нападот на родилиштето и детската болница во Мариупол бил „претстава во режија на украинските националисти“.
„Руската авијација не изврши никаква мисија за уништување цели во регионот на Мариупол“, изјави портпаролот на руското Министерство за одбрана, Игор Конашенков.
„Наводниот воздушен напад е целосна режија извршена со цел да се провоцира и да се одржи антируското расположение во јавноста на Запад“, рече тој.
