Министерот за образование и наука, Арбер Адеми, учествуваше на отворањето на новата спортска сала на основното училиште „Мустафа Кемал Ататурк“ во Гостивар, која, како што рече при обраќањето, е значајна освен за учениците и наставниците од ова училиште исто така и за другите млади кои се занимаваат со рекреација и спорт.
Спортската сала на ОУ „Мустафа Кемал Ататурк“ е со површина од 1 300 квадратни метри и има вградени гардеробери, туш-кабини, простории за сместување на спортските реквизити, како и посебни простории за наставниците по спорт и спортски активности. Опремена е со реквизити за кошарка, ракомет, мал фудбал, одбојка, пинг-понг и гимнастика. За нејзината изградба се потрошени 40 милиони денари од проектот „Изградба и опремување на 145 спортски сали во училиштата“ финансиран преку Банката за развој на Советот на Европа и буџетот на Министерството за образование и наука.
Адеми на отворањето кажа дека спротската сала може да ја користат клубовите, здруженијата и организациите кои ќе можат да ги развиваат своите обуки и професионални натпревари во овој објект.
Салата ги задоволува стандардите што ги бараат федерациите и националните и меѓународните организации, за што министерот Адеми изрази уверување дека од тука ќе произлезат многу нови врвни спортисти и спортски работници и ќе бидат иницирани врвни успеси и достигнувања.
Преку проектот „Изградба и опремување на 145 спортски сали во училиштата“ досега целосно се изградени и опремени 65 спортски објекти, од кои 26 во средни училишта и 39 основни училишта.
„Само годинава успеавме да ја заокружиме изградбата на 5 објекти, додека други 9 започнавме да ги градиме, а активностите се во тек и етапно ќе бидат заокружувани“, рече Адеми.
