Најмалку 24 лица беа повредени во последната бура што ги погоди централните и западните делови на Јапонија, додека 150 000 куќи останаа без електрична енергија.
Тајфунот Јонгдари, кој прво го погоди јапонскиот остров Хоншу, донесе поројни дождови и ветрови до 180 километри на час, пренесува Би-би-си.
Метеоролозите ги предупредуваат граѓаните дека иако Јонгдари спаѓа во редот на тропските бури, обилните дождови може да предизвикаат лизгање и одрон на земјиштето. Тајфунот се движи кон запад, а населението е предупредено да се евакуира навреме.
Агенцијата Кјодо објави дека тајфунот освен обилните врнежи го предизвика и феноменот топол ветар, наречен фен, кој предизвика висока температура до 40 степени.
Отежнат е и сообраќајот и откажани се сите летови на јапонските авиокомпании. Како што е наведено, дождот и високите температури ќе продолжат и во некои области дури и кога тајфунот поминува, што може да предизвика здравствени проблеми на граѓаните, како што се срцев удар и топлотен удар.
Од почетокот на јули во поплавите во Јапонија настрадаа 224 лица, а најмалку 80 лица беа повредени поради топлина, а повеќе од 22 000 беа хоспитализирани.
