Во централното градско подрачје на Скопје денеска ќе се одржи спортско-рекреативната трка „Centar Night Run“, поради што полицијата најави посебен сообраќаен режим. Настанот започнува во 17 часот, а учесниците ќе трчаат на патеки од пет и 21 километар.
Трасата опфаќа повеќе значајни сообраќајници во Општина Центар, меѓу кои улиците „Орце Николов“, „Франклин Рузвелт“, „Наум Наумовски Борче“ и „Михаил Цоков“, како и делови од булеварите „Илинден“, „Свети Климент Охридски“ и „Партизански одреди“. Сообраќајот ќе се пренасочува по околните улици додека трае спортскиот настан.
Министерството за внатрешни работи апелира возачите да ги почитуваат наредбите на полициските службеници и привремената сообраќајна сигнализација. Граѓаните што планираат движење низ центарот во попладневните и вечерните часови треба да ги земат предвид можните застои и пренасочувања.
