Од 15 ноември 2025 година, секој возач во Македонија ќе мора задолжително да има зимска опрема во возилото, соопштуваат надлежните институции. Оваа мерка, велат, е воведена за поголема безбедност на патиштата во услови на снег, мраз и ниски температури.
Непочитувањето на правилото ќе се казнува со глоба од 45 евра, без исклучок.
Што значи тоа за возачите?
За патничките возила (до 3.500 кг), задолжително е возилото да има зимски пневматици на сите тркала со минимална длабочина на шарата од 4 милиметри.
Доколку возилото користи летни гуми, возачот мора да поседува синџири за снег кои одговараат на погонските тркала, а шарата и кај летните гуми мора да биде најмалку 4 мм.
Кај тешките возила (над 3.500 кг) и оние со 4х4 погон, зимските гуми мора да имаат длабочина на шарата од најмалку 6 мм.
Автобусите и товарните возила кои не можат да користат синџири, се должни да имаат зимски пневматици на погонските тркала и прирачен алат во возилото.
Според сообраќајните експерти, почитувањето на ова правило значително го намалува ризикот од сообраќајни незгоди во зимски услови и овозможува побезбедно движење низ планинските и магливи региони на земјата.
