Коалицискиот партнер на ВМРО-ДПМНЕ и на Арсовска, Петар Георгиевски-Камиказа, преку објава на „Фејсбук“ призна дека ангажманот на неговата фирма КЛС за озвучување на новогодишната прослава чинел 14.000 евра, соопшти СДСМ.
„Наместо да се крие зад штури соопштенија, Данела Арсовска треба да излезе пред граѓаните и да каже кој платил за ангажманот на Камиказа. Граѓаните на Скопје гледаат дека градоначалничката од ВМРО-ДПМНЕ, Арсовска, не сработи ништо во првите два месеца од мандатот.
Сведочат само на поништувања значајни проекти, неспособност, погрешни одлуки. Гледаат дека нема бесплатен јавен превоз, нема инвестиции во животната средина. Буџетот за 2022 не е развоен, ниту е направен според потребите на граѓаните, не се предвидени пари за важни проекти, како нови паркови, зелени покриви, велосипедски патеки.
Не се обезбедени пари за ниту една велосипедска патека ниту за еден вело-паркинг, нема опрема за автобусите да превезуваат велосипеди, нема субвенции за дополнителна опрема. На Арсовска ѝ се побитни интересите на нејзините партнери отколку интересите на Скопје и неговите граѓани“, обвинуваат од владејачката партија.
